Зваліўся ў брудную лужыну і прасядзеў у полі ўсю ноч у мароз. Як уратавалі 10-гадовага Стаса, які знік у Баранавіцкім раёне
Хлопчык катаўся на ровары, павярнуў не ў той бок і паехаў у суседнюю вёску. Яго шукалі 300 чалавек.
Стас Ляшэнка знік у вёсцы Застарынне Баранавіцкага раёна вечарам 28 сакавіка. Дзесяцігадовы хлопец катаўся на ровары. Замест таго каб павярнуць налева, у бок дома, ён паехаў направа — у бок суседняй вёскі. Стас праехаў пяць кіламетраў і зразумеў, што заблудзіўся.
Калі хлопчык не вярнуўся дадому, бацькі занепакоіліся і пачалі пошукі. У ратавальнай аперацыі ўдзельнічалі трыста чалавек, Стаса шукалі ўсю ноч. Раніцай 29 сакавіка хлопчык знайшоўся. І, як выявілася, часткова выпадкова, піша «Віртуальны Брэст».
Як расказаў сам Стас, заблудзіўшыся, ён апынуўся ў чыстым полі. У цемры хлопчык не заўважыў брудную лужыну і ўпаў у ваду, прамокнуўшы да пояса. Тым часам тэмпература паветра апусцілася ніжэй за нуль. Стас схаваўся ў сухой канаўцы, акуратна паклаў побач з сабой ровар і пачаў клікаць на дапамогу. Але паблізу не было ніводнага жылога дома. Вакол — толькі цёмнае поле і поўная цішыня.
Цуд адбыўся раніцай. Мужчына з суседняй вёскі проста выйшаў накапаць чарвякоў для рыбалкі і пачуў слабыя крыкі аб дапамозе. Падышоўшы бліжэй, ён убачыў змерзлага і напалоханага хлопчыка. Мужчына адразу ж адвёў Стаса да сябе дадому, разам з жонкай яны пераапранулі яго ў сухое адзенне, сагрэлі і накармілі. Пасля гэтага адразу ж паведамілі ў праваахоўныя органы.
Маці Стаса расказала, што думкі былі страшныя.
«Чым даўжэй цягнуўся час, тым цяжэй рабілася. Сумленне грызла — я знаходжуся ў цяпле, а маё дзіця дзесьці там, адзін, у холадзе і страху…» — падзялілася жанчына.
Але раніцай ёй паведамілі, што Стас знайшоўся і ягонаму здароўю нічога не пагражае.
Каментары